Allgemein 2023

Weihnachtsfeier

Auch in diesem Jahr fand unsere Weihnachtsfeier beim Genussheurigen Böhm in Katzelsdorf statt.
Leider war gerade zu diesem Zeitpunkt eine Grippewelle im Umlauf und es mussten einige das Bett hüten.
Somit konnten anstelle von 42 leider nur 30 Hundefreunde an der Feier teilnehmen.

Die brave Thimy hat wieder ein Weinachtsgedicht vorgetragen.

Der Weihnachtshund von Richard Lux-Rubenser

Zu Weihnochtn im letztn Joah
haumma an Hund kriagt, wirklich woah
an liabn, klanan, schwoazn Murl
i sogs eich Leit ... des woa a Gsturl

jo ... es woa a muats Bahö
von dem i eich jetzt glei dazö

und des woa so:

da Voda lod zum Weihnochtsfest
jedes joa sich .... gerne Gäst
die Ötan und die Schwiegaleit
de kumman gern ... weus is net weit

da Onkel wird auch eingeladen
mit seine Oidn - dera Bladn
die Kinda wohnan eh no zaus
weu Plotz ... is jo no gnua im Haus

do kummans daun am Heulig Obend
frisch gwoschn und im Suntogsgwaund
und jeda bringt a schens Präsent
weu ma jo sunst bled redn kennt

Die Muada steht no mit de Stutzn
in da Kuchl und tuat putzn
des Gansl, des is a glei goa
des wird sicha guat - wie jedes Joah

da Voda putzt daweu in Bam
so is des hoit bei uns daham
daun muass a no die Packln hoin
des mocht a leise und vastoin

is Mensch, des kriagt a Kladl
wundasche ... weu ... sie wü am Ball boid geh
A I-Phone kriagt da Sohn
ois aundare des hot a schon

die Muada owa kriagt a Broschn
sunst hängst eam wieda au a Goschn
sie sudat eh des gaunze Joah
"nie bist daham" - nau kloa

Wia bitte ... soitats i sunst mochn
olle woins nua neiche Sochn
s Fräulein Tochta Schuach und Fetzn
da Bua a Mopet - zum umanaunda hetzn

die Frau Gemahlin neiche Möbl
sunst wohnat ma jo wie da Böbl
Mit an Wuat, der guade Mau
schaut, dassa sie des leistn kau

owa .. und des is recht peinsaum
die Muada is dadurch oft einsaum
und aus diesem simplen Grund
schenkt da Voda ihr ... an Hund

den bringt eam a Kollege grod
den sei Hündin Junge hot
da Hawara ... der bringt den Hund
justament ... zur rechtn Stund

und so hot da Voda jetzt
des Hundal untan Bam hi gsetzt
weu er in sein naiven Glaum
denkt: der Wöp stöt eh nix au

des Wöpal schloft und gibt a rua
da Voda geht, mocht Tia guat zua
und setzt sie daun scho volla Freid
zum Esstisch hi mit seine Leit

Und aus da Kuchl mit an Lüftal
riacht ma scho des Gansldüftal
olle ruafm "ahhh und ohhhh
schau do kummt des Essn scho"

die Muada stöt am Tisch des Gansl
auf amoi sogt da Onkl Hansl
"heast .. i glaub .. i hea do imma
so a klimpan ausn Nebnzimma"

"Geh ... Hansl Onkl gib a Ruah
schau aufs Gansl und greif zua"
da Voda nimmt Geflieglscha
auf amoi mochts an Pumpara

na no vü mehr ... an riesn Klescha
da Grossvoda valiert is Messa
in Voda hauts fost aus die Bock
weu er hot an potzn Schock

er springt auf, rennt hi zua Tia
reissts auf ... und mocht an Schra ois wia
Im Zimma ... im Zimma liegt da Bam am Bodn
und da klane Hund sitz obm

und in seina schwoazn Goschn
hot a ... da Muada ihre Broschn
da Voda schreit; "bist du varuckt"
worauf da Hund die Broschn schluckt

heast ... in den Zimma do schauts aus
es is jo echt da reinste Graus
des I-Phone Packl ist zarissn
des Handy is total zabissn

des Kladl ... is da reinste Fetzn
die Muada muass sie nieda setzn
da Tochta owa kummt des rean
"mit den Ball wiards nie wos wean"

da klane Hund kennt sie net aus
und hetzt jetzt kreiz quer durchs Haus
um des sie owa kana scheat
denn jetzt wiad amoi zaummankeat

daun stöns wieda auf des Bamal
des jetzt do hengt so wia a Schwammal
da Voda beruhigt daweu die Muada
und des Madl trest den Bruada

da Hund owa, des i ka guada
weu jetzt - jetzt hot des klane Luada
des Gansl grochn aufn Tisch
is üwan Sessl aufezischt

und daweu die aundan putzn
tuat er die Gunst der Stunde nutzn
der klane schwoaze Hundemau
schlickt von dem Gansl so vü a kau

wos eam in a Dilemma stiazt
weu des Gansl is stoak gwiazt
und so a klana Wöpmmogn
kaun so wos no net guat vatrogn

so hots den Hund duat hoiwat zrissn
und hot den Tisch voi ... eh scho wissn
owa ... bei dera wüdn Numma
is a die Brosch zu Vuaschein kumma

da Voda hot goa nix mehr gsogt
er hot den Wöpm afoch pockt
und eam no in da Heuligen Nocht
zruck zu sein Kollegen brocht

so hauma khobt für fost 1 Stund
letzte Weihnochtn .... an Hund

Und die Moral von der Geschicht
zu Weihnochten schenkt Tiere NICHT !!!